Aqmescitte ve Sarabuz qasabasında fevralniñ 24-nde aqşam patlavlar eşitildi, dep haber ete Qırım telegram kanalları. Rusiye Mudafaa nazirligi Qırımğa qarşı dron ücümi aqqında bildirdi.
Yerli saatnen 22:50-de"Jest Krım • Simferopol • Sevastopol" uçucısızlar gruppasınıñ Aqmescitke yaqınlaşqanını ve Rusiye Federatsiyası ava mudafaasınıñ iş sesleri aqqında bildirdi, soñra şeerde patlavlar eşitildi.
"Patlavlar şeerniñ bütün rayonlarında eşitildi! Pencereler qaltıray. Ava mudafaası çalışa. Duşman 10-15 uçucısız olğan ekiden dörtke qadar gruppanı qullandı!", – dep aytıldı haberde.
"Krımskiy veter" telegram kanalı saat 22:53-te Aqmescitte ve Sarabuzda yarım saat içinde eñ az 10 küçlü patlav eşitildi, dep haber etti. Sarabuz rayonında qızarıntı körüne, dep qoşuldı. Kanal malümatına köre, ücüm saat 23:50-ge qadar devam etti.
Bu ve diger Telegram kanallarında berilgen malümat teşkerilmeli.
Fevralniñ 25-nde saba Rusiye Mudafaa nazirligi bildirgenine köre, Rusiye Federatsiyasınıñ ava mudafaası Qırım ve Qara deñiz üzerinde 18 dronnı urıp tüşürdi, bunıñ delili kösterilmedi. Urıp tüşüriilgen uçucısızlarnıñ sayısını müessise aydınlatmadı.
Daa evel haber etilgenine köre, Qırım ve Aqyarda fevralniñ 23-nde aqşam ve fevralniñ 24-nde gece Novofedorovkadaki "Saq" arbiy uçaq alanında patlavlar eşitildi. Rusiyeniñ Ukrayinağa qarşı büyük cenki başlağanınen bu uçaq alanı ücümlerge endi oğrağan edi.
2022 senesinden başlap, Qırım yarımadasınıñ territoriyasına aman-aman er kün pilotsız uçaq ve raketalar ücüm ete, bu malümatnı teşkermege imkân olsa da, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.