Aqmescitteki tintüvden soñ tutulğan Ruslan Bekirov bağğa çıqtı. Bu aqta tuvğanları qırımtatar milliy areketiniñ faali Nariman Celâlğa haber etti.
Celâlnıñ Facebookta yazğanına köre, Bekirov tintüvden soñ talillerge alındı, tahminlerge köre, narkotik qullanuvınen bağlı talillerge.
Daa soñra Bekirov «Kiyevskiy» №2 politsiya bölügine ketirildi ve tuvğanlarınen bağlanmağa imkân berildi. Olarnıñ aytqanına köre, Bekirovdan malümat alıp yiberecekler.
Aqmescitte Rusiye quvetçileri aprelniñ 30-nda saba Aqmescit civarındaki Beki Eli (Jivopisnoye) köyünde evi teşkerilgen qırımtatar faali Dilâver Bekirovnıñ oğlu Ruslan Bekirovnıñ evini tintip, onı alıp ketti. Tuvğanları qayda alıp ketirilgenini bilmey edi. Evi teşkerilgen soñ oğlunıñ yanına ketken Dilâver Bekirovnıñ aytqanına köre, oğlu siyasiy ya da cemaat faaliyetinen oğraşmağan edi.
Aprelniñ 30-nda saba Aqmescit civarında Rusiye quvetçileri qırımtatarlarnıñ evlerini tintti.
Rusiye quvetçileri bunıñnen bağlı açıq izaatlar bermey.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
