Aprelniñ 30-ında Aqmescitte tintüvden soñ tututlğan Ruslan Bekirovnı, narkotik analizini yapqan soñ, evine yiberdiler. Bu aqta Bekirovnıñ advokatı Emine Avamilevanıñ sözlerinden Facebookta qırımtatar faali Nariman Celâl bildirdi.
“Polis hadimleri, qaysı madde boyunca cinaiy dava açılğanını, polisniñ Ruslan Bekirovğa olğan iddialarını açıqlamaqnı, baqıluvnıñ protokollarınen tanış olmaqnı kesen-kes red etti. Advokat, Ruslan Bekirov, Rolan Osmanov ve Dilâver Bekirovnıñ evlerinde keçirilgen teşkerüvda qanun bozmaları bar edi, dep ayta”, - yazdı Celâl.
Onıñ aytqanına köre, rusiye quvetçileri, Ruslan Bekirovğa Aqmescitten kememek ve analiz azır olğance - mayısnıñ 5-inece bağda olmaqnı tevsiye etti.
Aqmescitte Rusiye quvetçileri aprelniñ 30-nda saba Aqmescit civarındaki Beki Eli (Jivopisnoye) köyünde evi teşkerilgen qırımtatar faali Dilâver Bekirovnıñ oğlu Ruslan Bekirovnıñ evini tintip, onı alıp ketti. Tuvğanları qayda alıp ketirilgenini bilmey edi. Evi teşkerilgen soñ oğlunıñ yanına ketken Dilâver Bekirovnıñ aytqanına köre, oğlu siyasiy ya da cemaat faaliyetinen oğraşmağan edi.
Aprelniñ 30-nda saba Aqmescit civarında Rusiye quvetçileri qırımtatarlarnıñ evlerini tintti.
Rusiye quvetçileri bunıñnen bağlı açıq izaatlar bermey.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
