Aqmescitte bıltır iyul ayında alınğan qırımtatar sürgünliginiñ qurbanları abidesiniñ temel taşı demiryol vokzalı yanındaki Lenin bulvarınıñ skverge qaytarıldı.Crimeantatars.club saytı qayd etkenine köre, hatıra taşı tüzetilgen adnen qaytarıldı. Bundan ğayrı, «qırımtatar» sözünde hata bar.
Keçken yazda skver rekonstruktsiyası vaqtında temel taşı alınğan soñ onı Müftilikke bergenler. Anda ise taş başqa yerde tiklenecek dep aytqanlar, bu yıl mayısnıñ 18-nde ise onı eski yerine yañı yazınen qaytarğanlar.
Eski taşta yazılğanlar: «Bu yerde qırımtatarlar oğratılğan genotsid qurbanlarınıñ abidesi tiklenecek». Yañı levhada ise bunı yazğanlar: «2014 senesi aprelniñ 21-nde Rusiye prezidenti V.V.Putinniñ «Ermeni, bulğar, yunan, italyan, qırımtatar ve alman halqlarınıñ reabilitatsiyası ve inkişaflarına devlet yardımı» fermanı imzalanğan edi». «Qırımtatar» sözü rusça defisnen yazıldı, bu ise imlâğa zıt kele, lâkin Rusiye akimiyeti ve kütleviy haber vastaları bu sözni böyle qullana. Abide tiklenecegine dair sözler yoq oldı.
Qırımtatar halqı sürgünliginiñ qurbanları abidesiniñ temel taşı 30 yıl evelsi tiklengen edi. Er yıl mayısnıñ 18-nde bu abide ögünde matem tedbirleri keçirile edi.
2024 senesi mayısnıñ 18-nde qırımtatarlarnıñ sovetler tarafından Qırımdan sürgün etilüviniñ 80 yılı toldı. Şu künü Ukrayınada Qırımtatar halqı genotsidiniñ qurbanlarını añma künü devlet seviyesinde qayd etile.
1944 senesi mayısnıñ 18-nde Sovet rejimi Qırımdan Orta Asiyağa bütün qırımtatar halqını sürgün etti. Üç kün içinde 200 biñ qırımtatar mal vagonlarında Vatanından alıp çıqarıldı.
Er yıl Qırımda qırımtatar halqı sürgünliginiñ qurbanlarını añma tedbirleri, hususan Qırım paytahtıla matem mitingi keçirile edi. Amma Rusiye Qırım yarımadasını işğal etken soñ Aqmescitniñ merkezinde böyle aktsiyalarnıñ keçirilüvi yasaqlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
