Aqmescitte soñki künleri "Sarı şerit" areketiniñ faalleri Rusiye ilhaqına qarşı ukrayin tirenüviniñ manasını añlatqan 150 şerit ve 100 levhanı astıp çıqtılar. Bu aqta faallerniñ telegram kanalında haber etildi.
"Ukrayina halqı ögünde olğan bir çoq çağıruvlarğa baqmadan, tirenüv er kün arta. "Sarı şerit" areketiniñ faalleri soñki künleri 150-den ziyade şerit ve 100-den ziyade levhanı tarqattılar", — dep yazdı faaller, fotoresimlerni qoşıp.
"Sarı şerit" teşkilâtı — Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areket teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faal ola, hususan Aqmescit, Yalta, Kezlev ve Kefede, soñki vaqıtları ise olarğa küçük şeerlerniñ Simeiz, Balıqlava sakinleri qoşula.
Areketniñ eñ belli aktsiyalarından biri — sarı şeritlerniñ asılması ve yarımadada "Qırım Ukrayinadır" yazısı ile plakatlarnıñ yapıştırılmasıdır. Yaqında faaller Boiko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
