"Sarı şerit" faalleri Aqmescitte Ukrayinağa qol tutqan timsallerni tarqattılar, dep haber etile areketniñ telegram kanalında.
"Sarı ierit" areketiniñ faalleri küreşmege devam ete! Ve şeer soqaqlarındaki tirenüv timsalleri bunı isbatlay. Qırım azat etilüvini bekley, çünki Qırım Ukrayinadır", — dep aytıla beyanatta.
"Sarı şerit" teşkilâtı — Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areket teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyet eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa kiçik şeerlerniñ sakinleri de qoşula.
Areketniñ eñ belli aktsiyalarından biri — sarı şeritlerniñ asılması ve yarımadada "Qırım - bu Ukrayina" yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
