Qırımda mayısnıñ soñunda yağğan küçlü yağanaqlar neticesinde şimaliy dağ ve cenübiy tarafta özenlerde suv seviyesi köterildi. Aqmescitte Salğır özeni yalı kenarını bastı. Bu aqta Qırım.Aqiqat mühbiri bildire.
Suv Qırım paytahtındaki Gagarin parkını da bastı.
Rusiye akimiyeti bildirgenine köre, bir yıl evelsi Salğırda qayd etilgen kritik suv seviyesine qadar daa 1,5 metr bar. 2022 senesi yapılğan temizlik tesir etti.
Kiçik Salğırda da suv köterile.
Qırım.Aqiqat mühbiri qayd etkenine köre, Rusiye akimiyeti keçken seneniñ menfiy tecribesini köz ögüne alıp azırlandı, hususan Qarasuvbazar suv anbarında suv seviyesi evelden tüşürildi.
Mayısnıñ 29-nda yağğan yağmurlar neticesinde Yalta, Gurzuv, Aluşta, Koreiz, Bağçasaray ve Qarasuvbazarda bir qaç ev ve azbarnı suv bastı.
Qırımnıñ Rusiye Fevqulâde vaziyetler nazirliginiñ matbuat hızmeti Qırımnıñ gidrometeorologiya ve tabiat monitoring idaresine esaslanıp, Qırımda yağmurlar neticesinde şimaliy ve cenübiy taraflarda suv köterile, bazı yerlerni basa bile, dep bildirgen edi.
Qırımda küçlü yağmurlar ve saniyede 15-20 metr süratınen yel sebebinden furtuna havfı devam ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
