Aqmescitte Salğır yalısınıñ temelli tamiri başlandı. Bu aqta Qırım başı Sergey Aksönovnıñ köçme oturışında şeer memuriyetiniñ başı Natalya Malenko bildirdi.
“Mayıs 28-inde Salğır ve Küçük Salğır özenleriniñ yalılarınıñ temelli tamirlevine kontrakt imzalandı. Ekinci künden berli icracılar çalışmaqta, özen yatağı boyu tehnika içün üç noqta belgilendi. Müddetni hatırlaymız - sentâbrniñ 4-ü”, - dep yaza Malenkonıñ sözlerinden “Krıminform”.
Daa evel tender neticelerine köre, tamir işlerini yapacaq şirket kibi “Asgard” işhanesi saylandı. Evelce bu işhane “nezaketli insanlar”ğa abide qoyğan edi ve Puşkina soqağınıñ bir qısmını tamir etken edi.
2018 senesi Aqmescit özenleriniñ yataqlarınıñ temizlemesini yapmaq içün leyha azırlamaq içün “Asgard” 15 million ruble alğan edi.
“Asgard” öz işi içün 498,259 million ruble soradı. Tamir işler vaqtında özen köpürçikleri de tamirlenecek.
Malenkoğa köre, Aksönov sentâbrgece işni bitirmege buyurdı.
