Aqmescitte Rusiye quvetçileri, olarnıñ fikrince, demiryolda reley şkafını ateşke bermege azırlağan qadınnı yaqaladılar. Bu aqta Rusiye kütleviy haber vastaları Rusiye FSB-siniñ matbuat hızmetine atıf etip bildire.
''Aqmescitte keçirilgen tedbirler neticesinde 1999 senesi doğma Rusiye vatandaşı tutuldı, o, Ukrayina mahsus hızmetleriniñ emrinen, arbiy naqliyatnı bozmaq maqsadınen "Qırım demir yolu" RK DÜP reley şkafını yaqıp, terakt yapmağa azırlana edi", - dep bildire "Krıminform" neşri.
Berilgen malümatqa köre, Rusiye kontrolindeki Aqmescitniñ Kiyev rayon mahkemesi tutulğan qadınnı eki ayğa apiske aldı. Onı Rusiye Federatsiyası Ceza kodeksiniñ bir qaç maddesine istinaden qabaatlaylar: 30-ıncı maddesiniñ 1-inci qısmı, 205-inci maddesiniñ 1-inci qısmı (terakt azırlavı) ve 275-inci maddesine istinaden (devlet hainligi).
Tutulğan qadınnıñ adı ve soyadı belli degil, onıñ açıq izaatları da yoq.
Qırımda ve Aqyarda 2014 senesinden başlap eñ azından 16 Ukrayina vatandaşı "casuslıq" ve "diversiya"da qabaatlanıp mahküm etildi. 2015 senesi Rusiye mahkemesi rejissör Oleğ Sentsovnı teraktlarnıñ teşkil etilmesinde qabaatlap, 20 yılğa üküm etti. Rusiye quvetçileri "diversiya"nı "Hizb ut-Tahrir" islâm siyasiy teşkilâtınıñ vekillerine de yükley. Rusiyeniñ Ukrayinağa tam miqyaslı istilâsı başlağan soñ yarımadada cenk ile razı olmağanlarnı kütleviy surette taqip eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
