Qırımda Rusiye telükesizlik hadimleri Aqmescitniñ 39 yaşındaki sakinini ukrayin gruppalarından birinde "rus tili ve milletiniñ yoq etilmesine" çağırğan izaatları içün yaqaladı. Bu aqta Rusiye kütleviy haber vastaları Qırım ve Aqyar boyunca FSB idaresine atıf etip yaza.
"Qabaatlanğan 39 yaşındaki Aqmescit sakini, ruslarğa qarşı menfiy munasebette bulunıp, öz mevamını Rusiyege qarşı yayınlar yerleştirilgen ukrayin subet odalarından birinde açıq şekilde bildirmege qarar berdi. Qadın rus tilini de, rus milletini de yoq etmege çağıra edi", — dep yaza FSB-niñ Rusiye agentligi "RİA Novosti Krım".
Qadınğa qarşı Rusiye Federatsiyası Ceza kodeksiniñ 280 maddesine istinaden (ekstremizmge açıq çağıruvlar) cinaiy iş açıldı.
Qadınnıñ adı ve soyadı bildirilmey, onıñ açıq izaatları da yoq. Rusiye makemesi onıñ qabaatını tanısa, oña beş yılğa qadar apis cezası berile bile.
Daa evel Ukrayina prezidentiniñ Qırım Muhtar Cumhuriyetindeki temsilciligi, Roskomnadzor Rusiye Federatsiyası tarafından işğal etilgen Ukrayina topraqlarında, şu cümleden Qırımda, informatsion boşluq üzerinde nezaretni quvetleştire, dep bildirdirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
