Rusiye işğal etken Aqmescitte «Rusiye – def ol! Qırım – bizim evimiz!» yazısı peyda oldı. Bu aqta Qırımtatar Milliy Meclisiniñ reisi Refat Çubarov Facebook saifesinde bildirdi.
«Fevralniñ 26-sı – Qırımnıñ Rusiye işğaline qarşı tirenüv künüdir. Fotoresimde – Aqmescit bugün», – dep yazdı Çubarov.
Onıñ aytqanına köre, foto fevralniñ 26-nda saat 5-lerde çıqarıldı.
Ukrainada salı künü, fevralniñ 26-nda, «Qırımnıñ Rusiye işğaline qarşı tirenüv künü» qayd etile. 2014 senesi şu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
Ukrainada ve dünyada fevralniñ 26-nda qırımlılarğa ve memleketniñ topraq bütünligine qoltutuv aktsiyaları, munaqaşa, forum, miting ve yürüşler keçirile.
Salı künü, fevralniñ 26-nda, saat 14-ten 17-ge qadar UA:Perşıy, UA:Krım ve Qırım.Aqiqatnıñ «Qırımnıñ Rusiye işğaline qarşı tirenüv kününe bağışlanğan» marafonı keçirilecek.
Fevralniñ 26-27-nde Kyivde Ukraina prezidenti Petro Poroşenko ve ABD Devlet departamentiniñ Ukraina meseleleri mahsus vekili Kurt Volker «İşğal altındaki Qırım: tirenüvniñ 5 yılı» halqara forumında iştirak etecekler.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
