Rusiye kontrolindeki Qırım müftiligi bergen malümatqa köre, Aqmescitte General Vasilyev soqağında adı Halil oğlu Necmi olğan qart qırımtatarı tapıldı. Qayda yaşağanını ve şeerge nasıl tüşkenini hatırlamay.
«Onıñ aytqanına köre, Bağçasaray rayonında yaşay, yaqında tuvğan Ğavr (Plotinnoye) köyüne köçti. Aynı vaqıtta, Foti Salada (Golubinka) yaşağanını ayta. Qartbaba 91 yaşında. Dört balası bar. Büyük oğlunıñ adı Mansur, qızı Necibe bar. Qartbabanıñ alı yahşı, amma pek qorqqan», – dep aytıla Facebook haberinde.
Müftilik, tuvğanlarını tapmağa yardım etmege rica ete.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
2016 senesi noyabr ayında Qırımdan köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı.
2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
