Abideniñ yıqıluvı aqqında Qırımtatar Milliy Meclisi reisiniñ muavini İlmi Ümerov "Suspilne Krım" yayınlayıcısına ikâye etti.
1999 senesi Qırımtatar Milliy Meclisiniñ teşebbüsi ve Ukrayina Halq Areketiniñ yardımı ile Aqmescitniñ Sovet meydanında abide açıldı.
Ümerovnıñ qayd etkenine köre, general Petr Grigorenkonıñ abidesiniñ yıqıluvı aqqında oña mayıs 27-de ilhaq etilgen Qırımda yaşağan tanışı ikâye etti.
"Onı, büyük ihtimal ile, mayısnıñ 18-nde alıp kettiler. O, pek körüngen bir yerde degil edi, ve insanlar onı añlamay bile ediler. Belki de, anda er kes "akimiyet tarafından o qadar qorqutılğan ki, insanlar bir şey aytmaqtan bile qorqalar", — dep ayttı Meclis reisiniñ muavini.
İlmi Ümerov, Petro Grigorenko Mustafa Cemilevniñ mahkeme esnaslarına barğanını, Taşkentke mahkeme esnaslarından birine kelgenini ikâye etti.
Meclis reisiniñ muavininiñ aytqanı kibi, qırımtatarlar Petro Grigorenkonı ziyaret ete ediler, o olarnı evinde yaşamağa davet ete edi ve elinden kelgeni qadar destekley edi.
İlmi Ümerov, Qırımda Rusiye akimiyeti ukrayin mirası ile qırımtatarlardan daa sert küreşe, dep qayd etti.
"Olarnı (işğalcilerni - QA) er şey raatsızlay: ukrayin mektepleri, ukrayin sınıfları, ukrayin tili, mında ise bir general... Olar qırımtatarlardan da beter ukrayinlikni yoq eteler. Ukrayin mektepleri bütünley yoq oldı, qırımtatar mektepleri saqlanıp qaldı, amma başqa şeklinde. Qırım işğalinden evel bu mektepler qırımtatar tilinde oqutılğan mektepler edi, şimdi ise bu mektepler qırımtatarlarnıñ mektepleridir, olarda rus tilinde oqutıla, qırımtatar tilinde oqutılmay", - dep ayttı o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
