Qırımnıñ Rusiye akimiyeti qırımtatar uçucısı, Sovetler Birliginiñ eki defa qaramanı Amet-Han Sultannıñ adını taşığan meydanda, Aqmescitniñ merkezinde, onıñ abidesini tiklemege planlaştıra. Rusiye Devlet dumasınıñ qırımlı deputatı Ruslan Balbekniñ Facebook saifesinde haber etkenine köre, dört metrden yüksek abideniñ açılışı oktâbrniñ 25-ne planlaştırıla.
«Efsaneviy uçucı, Sovetler Birliginiñ eki defa qaramanı Amet-Han Sultannıñ abide leyhası tasdıqlandı. Abide açılışı 2019 senesi oktâbrniñ 25-nde Aqmescit merkezindeki Merkeziy bazar yanında Amet-Han Sultan meydanında ötkerilecek. Abide tiklevinden ğayrı hayırseverler bu yerli yeşillendirecek», – dep yazdı Balbek.
Onıñ qayd etkenine köre, eykeltraşnıñ ğayesine köre uçucı Ekinci cian cenkinde natsistlernen cenkleşken sovet urbasında olacaq.
«Abide tunçtan tökülip, granitnen yapılğan pyedestalğa qoyulacaq. Yüksekligi 4,5 metr olacaqtır. Leyhağa icadiy şekilde yanaştılar – meşur uçucınıñ arqasında qanatlar şeklinde eki qale olacaq, olar küçlü ruh, qaviy irade ve vatandaşımıznıñ büyük ustalığını timsal ete ve Amet-Han Sultannıñ Vatanı olğan Alupka aqqında hatırlatalar», – dep qoştı Balbek.
Onıñ matbuat hızmeti abide tiklemek teşebbüsine «Monolit» şirketi qoltuttı, dep bildirgen edi. Bir sıra qırımlı cemaatçı mezkür şirketni Qırımnıñ Rusiye yolbaşçısı Sergey Aksenovnıñ ailesinen bağlay, lâkin Aksenovnıñ özüm «Monolit» ile alâqaları olğanını inkâr ete.
Abide leyhası şirket tarafından azırlanıldı ve bu şirket onı tikleycek.
Qırımtatar halqınıñ erbabı, Sovetler Birliginiñ eki defa qaramanı, uçucı Amet-Han Sultan 1920 senesi oktâbrniñ 25-nde Alupkada doğdı. Babası – lakets (doğma Dağıstandaki Tsovkra-1 avulından), anası – qırımtatarı. Em dağıstanlılar, em qırımtatarlar Amet-Han Sultannı milliy qaramanları dep sayalar. Amet-Han Sultan 603 cenk uçuşını kerçekleştirip, natsist Almaniyanıñ ava quvetlerine ait 30 uçaqnı şahsen ve 19 danesini taqım erkânında urıp tüşürdi. Uçucı 100 çeşit uçquçnıñ qullanuvını ögrendi, onıñ ücümleri 4237 saatnı teşkil etti. Amet-Han Sultan Tu-16 adlı uçqan laboratoriyada sınav uçuşını kerçekleştirgende elâk oldı. Moskvadaki Novodeviçye mezarlığında defin etildi. 2015 senesi mayısnıñ 14-nde Ukraina Yuqarı Radası «Aqmescit» ava limanına Amet-Han Sultan adını berdi. Onıñ adını Mahaçkala (Dağıstan, Rusiye) ava limanı da taşımaqta.
