Link açıqlığı

Saatnıñ esas haberi

Aqmescitte Qırım işğaliniñ beşinci yılı qayd etilgeninden sebep yol parası eki künge lâğu etilecek


Aqmescitte Qırım işğaliniñ beşinci yılı qayd etilgeni munasebetinen cemaat naqliyatı bedava olacaq. Bu aqta şeerniñ Rusiye memuriyetiniñ matbuat hızmeti bildirdi.

«2019 senesi martnıñ 16-nda ve 18-nde belediye naqliyat vastaları bedava olacaq. Cemaat naqliyatınıñ aqşam saatlarında da toqtamayıp çalışması içün ayrı kontrol olacaq», – dep bildirdi matbuat hızmeti.

Daa evel haber etilgeni kibi, Aqmescit merkezi Qırım işğaliniñ beşinci yılına bağışlanğan «bayram yürüşi» sebebinden qapatılacaq.

Aqmescitte martnıñ 15-nde Qırım işğaliniñ beş yılına bağışlanğan avtoyürüşini Rusiye bayraqlarınen keçirmege planlaştıralar.

«Grajdanskiy ştab v podderjku Putina» cemaat areketiniñ keñeş reisi Aleksandr Sinâvskiy bildirdi ki, martnıñ 16-nda Aqmescit-Aqyar avtoyürüşiniñ keçirilmesi ve Aqyardaki Gasforta dağında «Noçnıye volki» motoklubınıñ meydanında «samooborona» vekilleri, qazaq ve «opolçenlerniñ» qarşılanması beklenile.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG