İyünniñ 24-nde Aqmescit merkezinde arbiy paradnı baqmağa istegenler pek çoq oldı, dep bildire Qırım.Aqiqat mühbiri.
Onıñ malümatına köre, saba Rusiye politsiyası seyircilerniñ sıcağını teşkere ve eşyalarını baqa, olarğa «75 zafer!» yazılı bayraqlar ve maskalar berile. Lâkin çoqusı maskanı taqmay ya da onı saqal tübüne kiye.
Mesafege de qulaq asmaylar. Parad olacaq soqaq boyu insanlar içün bir sıñır yoq – kelgenler bir-birine yaqın tura. Cenk yırları arasında kerekli sanitar-epidemiologik mesafeni qorumaq çağıruvları eşitile. Seyirciler arasında qartlar çoq, olar da maska taqmaylar.
Parad keçirilecek yerge veteranlar ketirildi, olarğa da maska bergenler. Amma, mühbirniñ qayd etkenine köre, bazıları olarnı betke taqmay.
Çarşenbe künü, iyünniñ 24-nde, Ekinci cian cenkinde ğalebe yılı munasebetinen Rusiye arbiy paradı sebebinden saat 7:00-dan 14:00-ğa qadar şeer merkezi areketke qapatıldı.
Ekinci cian cenkinde ğalebeniñ 75 yılı munasebetinen ananeviy arbiy paradlar bu sene mayısnıñ 9-nda olacaq edi. Amma koronavirus tarqaluv telükesi sebebinden keçirilüvi lâğu etildi. Daa soñra Rusiye akimiyeti Moskvada ötkerilecek paradnıñ yañı kününi ilân etti – iyünniñ 24-ü.
Aqyarda, Aqmescitte ve Keriçte de Rusiye arbiy paradları keçecek.
Rusiye kontrolindeki Qırım akimiyeti bildirgenine köre, koronavirus telükesi sebebinden paradnen bağlı merasimlerde tedbir alınacaq.
Keçken künü Qırımda 8 yañı koronavirus hastası qayd etildi. Umumen Qırımda, akimiyetniñ malümatına köre, 631 yañı koronavirus hastası qayd etildi. 36-sı çetelden keldi, 94-ü qomşu Rusiyeden kelgenler ve olarnen alâqada olğanlar. 429 insan yahşı oldı, 22 kişi vefat etti.
Rusiye işğal etken Qırımda 2014 senesinden soñ «Zafer künü» sovet ve Rusiye bayramı Qızıl Ordu ve sovet halqınıñ natsist Almaniyanı yeñgen bayramı olaraq qayd etilmekte.
