Aqmescitte Rusiye quvetçileri “nezaketli adamlar” eykeline boya tökken aqaynı yaqaladılar. Bu husustaRusiye İçki İşler Nazirliginiñ Qırım bölügi bildire.
“Aqmescitte polis hadimleri “nezaketli adamlar” eykeline boya tökken aqaynı tutıp aldı. O adam pek sarğoş edi”, - dediler matbuat hızmetinde.
Aqaynıñ aqqında, Memuriy Uquq bozuv Kodeksiniñ 20.21 maddesi (umumiy yerlerde sarğoş alında bulunuv) boyunca protokol yazıldı ve Cinaiy Kodeksniñ 214 maddesi (vandallıq) boyunca cinayet davası açılması aqqında mesele çezile.
Kreml nezaretindeki Aqmescit şeer memuriyetiniñ bası Natalya Malenko bildirgenine köre, şeer hızmetçileri boyanı eykelden endi yuvup aldı.
"Nezaketli adamlar" abidesi Aqmescitte 2016 senesi iyül ayında qoyuldı.
2014 senesi Qırım işğal etilgen vaqıtta yarımadada tanıtma işaretleri olmağan silâlı insanlar peyda oldı, olar ukrain ordusınıñ areketlerini blok ete ediler. Soñra, Rusiye prezidenti Vladimir Putin «Nezaketli adamlar» Rusiye Silâlı quvetleriniñ hadimleri olğanını tanıdı.
