Aqmescit sakinleri kirli musluq suvından şikâyet etmege devam ete. Akimiyet suvnı temizlep olamağanını tanıy ve «vicdansız tış hızmetçisini» qabaatlay.
«Keçken afta esas mevzu GRES, Moskoltso, Bogdanovka, Saraylı Qıyat (Mirnoye – QA) ve atta Borodinağa qadar barğan kirli suv oldı. Sebep kene aynı – vicdansız tış hızmetçisi, hatlardaki qazalarnı çezip olamay, ve şeerge kene keyfiyetsiz suv berdik», – dedi fevralniñ 15-nde «Voda Krıma» müessisesiniñ reberi Vladimir Bajenov suv teminlevi problemleri operativ ştabınıñ toplaşuvında.
Onıñ aytqanına köre, boruda suv başqa tarafqa ketti ve toplanğan bütün çamur qullanıcılarnıñ musluqlarından aqtı.
«Avağa baqıp, şeer soqaqlarına gidrantlardan suv berip olamayım, çünki kerçek taylaqlar yaparım. Şunıñ içün bu taraftan suv berilüvini toqtattıq, ayan suvına aylandıq ve kün soñuna qadar sakinlerge temiz ayan suvını berecekmiz», – dep işandırdı Bajenov.
Aqmescit sakinleri suv qıtlığı başlağanından kirli ve yaramay qoqulı suvdan şikâyetçi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
