Aqmescitte mayıs 9-ında Gagarin parkında Ebediy meşal ögüne güldestelerni qoydılar ve cenk aqqında türkülerni yırladılar. Aqmescitliler anda sabadan başlap birer, qorantalarnen, gruppalarnen kelip başladı, bildire Qırım.Aqiqat mühbiri.
Parknıñ ziyaret etkenlerniñ arasında cenk pensiyalıları, Afğan cenkiniñ veteranları, kazaklar, Rusiye nezaretindeki Qırım akimiyetiniñ vekilleri edi. Amma tibbiy maskalarnı er kes taqmadı.
Ebediy meşalğa çeçek qoyulğanından soñ adamlar suret çekti ve cenk aqqında türkülerni yırladı, hususan, akimiyet tevsiyet etken "Ğalebe künü" türküsini. Bazıları öz cebeci soylarınıñ portretlerinen keldi.
Şeer içinde Ğalebe bayrağınıñ kopiyasınen yürgen ayaqmaşnacılarnı ve "Ölümsiz polk" aktsiyasınıñ tarafdarlarını körmek mümkün edi.
Aqmescit memuriyetiniñ emri ile "Estrada sanatının merkezi"niñ orkestriniñ çalğıcıları cenk veteranlarınıñ pencereleriniñ tübünde küçük kontsert yaptı.
Keriçte mayısnıñ 9-ında koronavirus sebebinden "Ulu vatan cenkinde ğalebeniñ 75 yıllığına bağışlanğan" adiy parad yerine uçaq paradı keçti.
İlhaq etilgen Qırımda ve Aqyarda mayısnıñ 9-ında "Ğalebe künü" qayd etile.
Daa evel bildirilgeni kibi, ilkaq etilgen Qırımda mayısnıñ 9-ında koronavirus pandemiyasından sebep kütleviy tedbirler olmaycaq. Mayısnıñ 7-sinde Qırımda mayıs 9-ında keçirileck merasimlerniñ cedvelini ilân etiiler, olarnıñ çoqusı onlayn olacaq.
Aqyarda mayıs 9-ında koronavirus epidemiyasına baqmadan bir sıra merasimlerni keçirecekler. Hususan, gemi ve uçaqlarnıñ paradları olacaq.
Празднование Победы над нацизмом в 1945 году по всему миру – архивные фото
Rusiye Mudafaa naziri Sergey Şoygu mayıs 9-ında bir sıra Rusiye şeerlerinde ve ilhaq etilgen Qırımda bayram salütlarnıñ patlatılmasını buyurdı.
Rusiye işğal etken Qırımda 2014 senesinden berli sovetlerniñ ve Rusiyeniñ «Ğalebe künü» Qızıl ordu ve sovet halqınıñ natsist Almaniyası üzerindeki ğalebe künü olaraq qayd etile. Ukrainada mayısnıñ 8-nde Hatıra ve barışuv künü qayd etile, mayısnıñ 9-ı ise – Ekinci cian cenkinde natsizmni yeñüv künü olaraq.
