Avgustnıñ 25-nde RF nezayerti astında olğan Kiyev rayon mahkemesiniñ binası ögünde yaqalanğan qırımtatar faali Eldar Aliyev 7 künlük tevqiften soñ azat etildi. Bunı "Qırım birdemligi" cemaat birleşmesi haber ete.
"Avgustnıñ 24-nde Aliyevge qarşı memuriy protokollar tizildi. Birincisi, adam çoq olğan yerde kütleviy toplaşuvnı teşkil etüv. Neticede bu içtimaiy nizamnı bozdı. Ekincisi, polis hadimleriniñ talaplarına riayet etmeme. Aliyev özüni qabaatlı saymağanını ve onı sebepsiz yaqalanğanlarını bildirdi", - dep yazıla bildirmede.
Faal mahkeme oturışına diñleyici kibi kelgenini qayd etti. Mahkeme zalına onı yibermegenler. Polis hadimleriniñ vesiqalarını köstermek talabına Aliyev pasportını köstergen, bundan soñ onı şefqatsızlıq ile yaqalağanlar.
Avgustnıñ 24-nde Bağçasarayda ve Bağçasaray rayonında Rusiye uquq qoruyıcıları qırımtatarlar Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi. Bundan soñ olarnı Aqmescitteki FSB binasına alıp ketkenler. Avgustnıñ 25-nde Rusiye mahkemesi olarnı eki ayğa SİZOğa yolladı.
Soñra Rusiye kontrolindeki Aqmescitniñ Kiyev rayon mahkemesi tutuğan 22 kişini 1 künden 7 künge qadar apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
