Aqmescitte bazar künü, iyünniñ 23-nde, aqşam sağanaq yağa. Qırım.Aqiqat mühbiriniñ bildirgenine köre, Karl Libkneht, Roza Lüksemburg ve Lev Tolstoy soqaqlarını ve Merkeziy demiryol vokzalı rayonını suv bastı.
Yollardaki suvda terek dalları ve soqaq çöplügi bar. Cemaat naqliyatınıñ areketi qıyınlaştı.
Google Haritalarınıñ malümatına köre, Aqmescit merkezinde yollarda tıqanıqlıqlar peyda oldı.
Qırım.Aqiqat malümatına köre, sağanaq daa küçlü yağa.
Daa evel iyünniñ 23-nde Qırım gidromettsentri yarımadada ava bozulacaq, dep tenbilegen edi: yağmur yağacaq, bora ve yel quvetleşecek.
Batqan Qırım. Sağanaqlar yarımadanı qapladı (süret toplamı)
İyünniñ 7-nde sağanaq neticesinde Aqyarnı suv basqan edi. Şeerniñ çeşit rayon ve soqaqları, Kazaçya Buhta ve Aqyar avtovokzalı da suv altında qaldı.
Aqyarnıñ şeer hızmetleri ve qurtarıcıları sağanaq aqibetleri sebebinden daa çoq çalışmağa mecbur oldı.
Aqmescitte de sağanaq yağğan, yollarda tıqanıqlıqlar peyda olğan edi.