Aqmescitte iyünniñ 28-nde ava bozulacaq, dep bildire Qırımdaki Rusiye Fevqulâde vaziyetler nazirliginiñ idaresi Qırımnıñ gidromettsentr malümatına esaslanıp.
«Yaqın 2-3 saatta ve iyünniñ 28-niñ soñuna qadar Aqmescitte küçlü sağanaq, boranlı yağmur, burçaq yağması, saniyede 20-25 metr süratlı yel esmesi beklenile», – dep aytıla haberde.
Yaqın raatlıq künleri Qırımda ava suvuq olacaq, sağanaq, boranlı yağmur yağması ve şiddetli yel esmesi beklenile.
Furtuna havfı ve yüksek yanğın havfı qala, dep bildire Qırımnıñ gidromettsentri.
İyünniñ 24-nde Qırımda ava bozulğan edi. Yaltada bir qaç soqaq ve yerastı keçitni suv bastı, Aqmescitte ise elektrik naqil hatları bozulğanı içün şeerniñ bir qısmı ışıqsız qaldı.
Qırımda iyünniñ 26-ndan 29-na qadar yanğın telükesi yüksek olğanından ateş yaqmağa yasaq etildi.
