Aqmescitte 10 kün nezaret altında bulunğan Zekkiy Kulametov azatlıqqa çıqtı. O, politsiyanıñ emirlerini yerine ketirmegeni ve içtimaiy ağlarda paylaşqanları içün memuriy ceza alğan edi. Bu aqta sentâbrniñ 14-nde Qırım.Aqiqat mühbiri bildire.
İzolâtor binasınıñ yanında Kulametovnı yarımadanıñ farqlı köşelerinden kelgen 50-ge yaqın qırımtatar faali qarşıladı.
Zekkiy Kulametov er keske minnetdarlığını bildirip, sağlığı yerinde olğanını ve bir şikâyeti olmağanını ayttı. Qırımlınıñ qayd etkenine köre, davasında «adalet olmasını» talap etecek. Onıñ imayecisi İslâm-Terek mahkemesiniñ memuriy cezası qararını şikâyet etti, yaqın künlerde onı Qırımnıñ Yuqarı mahkemesi baqmalı.
Kulametovnıñ imayecisi Mustafa Seydaliyev qayd etti ki, qırımtatarı izolâtordan kündüz çıqarılmalı edi.
«Mahkeme qararında qayd etile ki, memuriy ceza müddeti Kulametovnıñ tutılğanından sayılmağa başlay. Bölükke ketirüv protokolı sentâbrniñ 4-nde saat 13:45-te tizildi. Amma qaranlıq çoqtan tüşti, onı saat 22:30-da çıqarıp yiberecekler. Demek ki, bu memlekette kün bütün dünyadan farqlı bir şekilde esaplana. Uquq qoruyıcı organları ne istese, onı yapa, areketleriniñ sebebini biz bilmeyik. Amma bunı mıtlaq şikâyet etecekmiz», – dedi Seydaliyev.
Kreml kontrol etken İslâm-terek rayon mahkemesi Eski Qırım sakini Zekkiy Kulametovğa 10 kün memuriy apis cezasını tayin etken edi. Bunıñ sebebi Rusiye memuriy cinayetler kodeksiniñ eki maddesi (19.3 ve 20.3) olğan.
Bundan evel Kreml kontrol etken İslâm-Terek rayon mahkemesi Zekkiy Kulametovnıñ ömür arqadaşı Zarema ve qızları Rianağa 1000 ruble (tahminen 410 grivnâ) para cezasını tayin etken edi. Olarnı içtimaiy ağlarda yasaqlanğan timsallerni tarqatmalarında qabaatladılar.
Sentâbrniñ 4-nde saba Eski Qırımda Kulametovlar qorantasınıñ evinde tintüv ötkerildi. Aileniñ üç azası politsiya bölügine alıp ketirildi.
Rusiye uquq qoruyıcıları bunı açıq bir sürette izaatlamadı.
2018 senesi fevral ayında Zarema Kulametova politsiya bölügine çağırılğan edi. Onı politsiya hadimini «aqaretlemesinde» qabaatlağan ediler.
Qabaatlayıcı tarafnıñ malümatına köre, Kulametova oğlu Geray Kulametov tutulğanda politsiya hadimini aqaretlep, ayatını telükege oğratqan edi. Taqiqat, Rusiyeniñ İslâm-Terek rayonı politsiya bölüginiñ yolbaşçı muavini Andrey Rogojin aqaretke oğradı, dep israr etken edi.
2018 senesi aprel ayında İslâm-Terek rayon mahkemesi onı Rusiye ceza kodeksiniñ 319-ıncı maddesine köre qabaatlı tanıp, qadınnı 250 saat şartlı işlerge ve politsiya hadimine 20 biñ ruble (8,2 biñ grivnâ) miqdarında tazminat ödemesine mecbur etti.
Zarema Kulametova qabaatını tanımadı, imayesi mahkeme qararını şikâyet etse de, neticesi olmadı.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan «Hizb ut-Tahrir» teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
