Rusiye Aqmescitte FSB tarafından idare etilgen yañı tahqiqat tevqifhanesini açtı, dep bildire "Qırım uquq qoruyıcı gruppası".
"Şirketler aqqında bütün açıq malümatnı toplağan Rusiyeniñ SPARK sistemasına köre, "Federal ceza icrası hızmetiniñ "8 sanlı Tahqiqat tevqifhanesi" Federal devlet müessisesi" 2022 senesi oktâbrniñ 24-nde qayd etilgen. Müessiseniñ yolbaşçısı vazifesine İdrisov Rauf Maratoviç tayin etilgen", – dep yazıla bildirmede.
Uquq qoruyıcılarnıñ bildirgeni kibi, izolâtor Elevatornıy aralığı 4 adresinde qayd etilgen. Aynı bu adres boyunca 2-nci nomeralı SİZO yerleşe.
Qırım uquq qoruyıcı gruppasında, 2-nci sanlı SİZO siyasiy mabüsler, kombatantlar ve Ukrayinanı desteklegen vatandaşlar tutulğanını qayd eteler.
Evel Varşavadaki (Warsaw Human Dimension Conference) OSCE konferentsiyası çerçivesinde aq qorçalayıcılar Qırım sakinleriniñ Rusiye uquq qoruyıcıları tarafından taqip etilüvi aqqında tarif etti. Aq qorçalayıcılarda olğan malümatqa köre, Qırımda siyasiy sebepli taqipniñ 186 qurbanından 110-u qırımtatar ola, tintüvlerniñ 75%-ı qırımtatarlarnıñ evlerinde keçirile. Aq qorçalayıcılar qayd etkenine köre, «bu, Qırımda işğalci akimiyet bozğan halqara normalarnıñ tek bir qısmı ola».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
