Aqmescitte Kiyev rayon mahkemesi yanında, Qurman rayonınıñ tutılıp alınğan uç sakinine qol tutmaq içün adamlar toplana. Fevral 15-inde olarnıñ sıñırla tedbiri saylanacaq. Bu aqta fevral 15-inde “Qırım birdemligi” bildire.
Faallerniñ yazğanına köre, mahkeme oturışınıñ başlağan vaqtı daa belli degil, amma buna baqmadan, insanıp sabadan kelip başladı.
Daa evel Qurman rayonınıñ Büyük Onlar (Oktâbrskoye) qasabasında Rusiye quvetçileri qırımtatarlarnıñ evlerini tinte, dep haber etilgen edi. «Qırım birdemligi» birleşmesiniñ malümatına köre, Aqmescitteki FSB idaresine Eskender Abdulğaniyev, Arsen Abhairov ve Rustem Emirüseinov alıp ketirildi.
Rusiye Federal telükesizlik hızmeti, tutılıp alınğan Qurman rayonınıñ üç sakini, «Hizb ut-Tahrir» teşkilâtınıñ bölügini qurğanından ve anda iştirak etkenini iddia ete.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
