Aqmescitte şeer naqliyatnıñ beş marşrutında areket sheması deñişti. Bu aqta rusiye şeer memuriyetiniñ matbuat hızmetinde haber ettiler.
“Dörtünci şeer marşrutı №93-üncisine deñiştirildi. Bazarertesi künü biz, şeerlilerniñ şikâyetleri ve itinasız işi içün hususiy taşıyıcınen muqaveleni bozdıq. Şimdi bu marşruttan daa büyük “Goravtotransport” avtobusı yürecek. Avtobuslarnıñ arası 10-12 daqqa olacaq”, - dep qayd etti memuriyetniñ baş muavini Pavel Kuznetsov.
“Krasnoarmeyskaya soq. - Krımskaya soq.” marşrutınen yürgen №12 avtobusnıñ ve “Danilova soq. - Cumhuriy arbiy komitet” marşrutınen yürgen №67 avtobusnıñ areketi de deñiştirilecek. Akimiyetniñ malümatına köre, soñkisi “Zavodskoye” ava limanı - Davıdovka” №50 marşrutınen birleştirilecek.
“Bitumnoye - “Ğarbiy” avtostantsiya” №55 marşrutı da deñişecek. Endiden o Aqmescit rayonınıñ Molodöjnoye köyüne de kirecek. Bundan ğayrı, №6 şeer marşrutı Aqmescit rayonınıñ Beki Eli (Jivopisnoye) köyünece uzunlaştırıldı. Şimdi o Balaklavskaya soqağından başlap, Amet-Han Sultan ve Moskovskaya meydanlarından keçip, köygece baracaq.
