Aqmescitte N.A. Semaşkonıñ adına tibbiy merkezde avalandırıcı cihazlarlı 45 reaminatsiya yerini azırladılar. Bunı Qırım baş naziriniñ müavini Yevgeniy Kabanov bildirdi.
"Kün tertibiniñ esas meselesi - hastahaneniñ daimiy olaraq tibbiy cihazlarnı çalıştırmaq içün bütün müendis kommunikatsiyalarına bağlamaqtır. Sazlama işleri bitip tura, kerekli tibbiy gazlar ketirildi, teşkerildi ve qullanuvğa azırdır. Tibbiy hadimler de, talimattan keçip, avalandırma cihazlarnıñ pekitüvinde iştirak ete", - dedi Kabanov.
Onıñ aytqanına köre, umumen müessisede 80 avalandırma cihazı bar.
N.A. Semaşkonıñ adına tibbiy merkeziniñ açılışı bu yıl mayıs ayında keçmege planlaştırıla.
Aprelniñ 5-nde saba işğal edilgen Qırımda 2974 insan tibbiy közetüv altında, 2886-sı dinamik közetüvde qala. 66 insan hastahanede, 22 insan observatorda buluna. Qırımda 20 koronavirus yuqunçı hastası qayd etildi, 6 tüzelgen hasta hastahaneden çıkarıldı. Aqyarda 5 kişi koronavirusqa oğradı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
