«Veciye Kaşka davası» boyunca qabaatlanğan qırımtatar faali Asan Çapuh Aqmescit SİZOsından 7-nci şeer hastahanesine avuştırıldı. Bunı tuvğanları Qırım.Aqiqatqa haber etti.
Qırımtatar faaliniñ sağlığınen bağlı tafsilâtlı bir malümat berilmedi.
Daa evel «Veciye Kaşka davası» boyunca qabaatlanğan Asan Çapuhnıñ açlıqnı toqtutmağa mecbur olğanı belli oldı. O, tibbiy yardım kösterilmesini talap etip, sentâbrniñ 15-nde Aqmescit SİZOsında açlıqqa başlaycağını ilân etken edi.
Çapuh, alı pek fenalaşqanı içün advokat Ayder Azamatovnı diñlep açlıqnı toqtattı.
Ukraina Tış işler nazirligi Rusiyeden Asan Çapuhnı azat etmesini talap etti.
2017 senesi dekabr ayında Çapuh SİZOda mikroinsult keçirdi ve acele tibbiy yardımğa muhtac edi. Mabüs tibbiy teşkerüvden keçti, lâkin advokat ne diagnozını, ne de alını bile.
2017 senesi noyabrniñ 23-nde Aqmescitte Rusiye telükesizlik hadimleri, Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Sentâbrniñ 11-nde Rusiye nezaretindeki Aqmescit Kiyev rayon mahkemesi, «Veciye Kaşka işiniñ» iştirakçilerini eki ayğa daa apiste qaldırdı. Olar Türkiye vatandaşı Yusuf Aytandan para talap etüvde şeklene. Rusiye telükesizlik hadimleri olarnı tutqan maalde qırımtatar milliy areketiniñ veteranı Veciye Kaşka yaramay. Daa soñra qadın vefat ete.
Qırımtatar milliy areketiniñ faali Nariman Celâl, Türkiye vatandaşı, Veciye Kaşkanıñ qorantasından para hırsızlağan edi, dep bildire.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
