Semaşko Cumhuriyet hastahanesinde martnıñ 29-nda apiske alınğan bloger, cemaat jurnalisti Nariman Memedeminovğa eki aydan berli beklegen ameliyat yapıldı. Bu aqta Narimannıñ ömür arqadaşı Lemara Memedeminova «Qırım birdemligine» haber etti.
Onıñ aytqanına köre, ameliyat yahşı keçti. Memedeminov qaravul baqqan eki kişilik odağa keçirildi. Hastahanede ne qadar qalacaq daa belli degil.
Lemara Memedeminovnıñ aytqanına köre, oña aqayını körmege izin berilmedi ve ekim ketirmege ruhset bergen aş almadılar.
Bundan evel Ukraina Yuqarı Radasınıñ vekâletlisi Lüdmila Denisova, onıñ aytqanına köre, «telükeli hastalıqqa» oğrağan Memedeminovnıñ «kritik alı» sebebinden Rusiye ombudsmeni Tatyana Moskalkovağa muracaat etti.
Advokat Emil Kurbedinovnıñ aytqanına köre, Memedeminov eki aydan berli acı çeke ve ameliyatqa muhtacdır,
Advokat diagnoznı aytmadı, amma Memedeminov yaqın künlerde acele ameliyatqa muhtac, çünki «onıñ tedaviylenmesi pek sozuldı», dep qayd etti. Kurbedinov muvekkiliniñ «acele ameliyat olması içün bütün qurulışlarğa muracaat etkenini» bildirdi.
Rusiye kontrolindeki Qırım Yuqarı mahkemesi Memedeminovnıñ apis cezasını mayısnıñ 16-na qadar uzattı.
Martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
