Aqmescitte (Simferopol) iyül 8-inde, Qoranta, sevgi ve sadıqlıq Kününe bağışlap, aileviy haç yürüşini keçirmege niyetlener. Bu aqta Aqmescit ve Qırım yeparhiyasınıñ (UPTS MP) matbuat hızmeti bildirmekte.
"İyül 8-inde saat 9:00 Aqmescitniñ Bala parkında aileviy haç yürüşi keçirilecek, onıñ başında mitropolit Aqmescit ve Qırım Lazari olacaq", - dep aytıp berdiler matbuat hızmetinde.
Böylece, haç yürüşiniñ iştirakçileri parknıñ baş qapısına kirip, pravoslav azizleri Pötr ve Fevroniya Muromskaya eykeline baracaqlar.
Duada tantanalı iştirak etmek içün, qorantalarğa evlendirüv ikonalarınen kelmege teklif ettiler, dep bildire matbuat hızmeti.
Qoranta, sevgi ve sadıqlıq künü Rusiyede ve ilhaq etilgen Qırımda iyülniñ 8-inde qayd etile. Bu bayram, pravoslav ananesinde aileni imaye etken aziz kinaz Pötr ve onıñ qadını Fevroniyanıñ hatıralarına bağışlanğan.
Ukrainada iyül 8-inde Qoranta Künü qutlana, o 2011 senesi prezident buyruğınen tayinlengen edi.
