Aqmescitniñ Rusiye memuriyeti 51 ticaret noqtasını yıqmağa qarar aldı. Bu aqta memuriyetniñ matbuat hızmeti bildirdi.
«Memuriy-tehnik kontrol, ticaret ve ealige turmuş hızmet idaresi, belediye kontroliniñ idaresi bergen malümat baqılğan soñ 51 obyektni yıqmağa qarar alındı», – dep qayd etti matbuat hızmeti.
Qayd etilgenine köre, dört obyektniñ yerleşüvi qanunğa uyamı-yoqmı teşkermek içün qoşma muracaatlar yollanacaq.
Aqmescitteki Rusiye memuriyetiniñ yolbaşçı muavini Sergey Titarenkonıñ qayd etkenine köre, komissiya işiniñ neticelerine köre obyektlerniñ yıqıluvınen bağlı qarar alınacaq.
«Yıqıluvğa berilgen müddet yekünlengen soñ qanun talaplarına köre obyektlerni yoq etüv işleri keçirilecek», – dep qayd etti Titarenko.
Sentâbr ayında belli olğanına köre, yılnıñ soñuna qadar Aqmescit memuriyeti şeerde «qanunsız qurulğan» 350 obyektniñ yıqıluvınen bağlı añlaşmanı tizecek.
Yanvar ayında Aqmescit memuriyeti 60 let Oktâbrâ soqağındaki 80 garajnıñ saibini qıdırğan edi.
Qırım ve Aqyarnıñ yerli akimiyeti qanunsız ilân etilgen ticaret inşaatlarınen küreşe, hususan tükân, qavehane, bazarlardaki ticaret noqtaları ve raatlıq evleri yıqıla.
