İlhaq etilgen Qırımda “Gorod” devlet müessise, fevral 23-ü, cumaertesi kününden başlap, soqaq-yollarnı temizlemek içün 120 tonna reagent qullandı. Bu aqta “Krıminform”ğa “Gorod” müdiri Nikolay Konovalov bildirdi.
“Tünevinki aqşamda işke 10-dan ziyade mahsus maşnalar çıqtı. Bu, hususan, 8 tuz sepken maşna ve üç fırçılı traktor. Buzlavuqnı iritken maddelerniñ 120 tonnası masraf etildi”, - dedi Konovalov.
Aqmescitniñ bütün şeer hızmetleri, fevral 23-ünden arttırılğan iş rejimine keçti.
Fevral 25-inde bazaertesi künü, deñişici bulutlılıq, buzlavuq ve şiddetli ğarbiy yel beklenile, dep bildire yarımada gidromettsentri.