Aqmescitniñ Bavurçı (Kamenka) mikrorayonında çöplükni saylap ayırğan zavod çalışıp başladı, dep haber ete fevralniñ 2-nde Qırımnıñ Rusiye ükümetiniñ matbuat hızmeti.
Qayd etilgenine köre, kompleksniñ küçü yılda 150 biñ tonna qattı kommunal qalımtılarını yapmağa ve Aqmescitniñ bütün qattı kommunal qalımtılarını işlemege yete.
«Obyekt, 2021 senesiniñ soñuna qadar çalışıp başlaycaq ekinci nevbetten soñ yılda 250 biñ tonna qattı kommunal qalımtıları olacaq çöplük saylap ayırğan kompleksniñ birinci nevbeti ola», – dep bildirdi matbuat hızmeti.
Kompleks çerçivesinde ekinci hammal (plastik ve polimer) işlenmesini teşkil etmege planlaştırıla.
Qırımnıñ Rusiye ükümeti bildirgenine köre, kompleks donatmalarına 220 million rubleden çoq sarf etildi. Ekinci nevbetten soñ masraflar 300 milliondan çoq olacaq.
Kreml kontrolindeki Qırım ükümeti, «kompleks donatmaları ekologik qanunlarnıñ bütün sert talaplarına riayet ete», alınğan tedbirler ise «qalımtılarnıñ dağıluvına, topraqqa tiymesine ve kompleks tışında yaramay qoqu tarqalmasına yol bermeycek», dep işandıra.
Hatırlatamız, bıltır dekabr ayında Qırımnıñ Rusiye yolbaşçısı Sergey Aksenov Bavurçıdaki çöplükni saylap ayırğan zavod mikrorayon sakinleri qarşı olğanı içün çalıştırılmadı, dep bildirgen edi. Mesken evler pek yaqın.
Aqmescitteki Bavurçıda şeerniñ esas çöplük alanı yerleşe, 2017 senesi onı resmiy şekilde qapatqanlar. Çöplükni işleycek büyük kompleks bir yıl devamında quruldı.
Aqmescitniñ Rusiye akimiyeti qattı turmuş qalımtıları problemini qısmen çezmege tırışa.
Yerli sakinlerden ibaret teşebbüs gruppası çöplükni saylap ayırğan kompleksniñ işine qarşı çıqa. Faaller, Tahqiqat komitetinden kompleksniñ baş planını teşkermesini rica etti.
2020 senesi iyül ayında Bavurçı sakinleri Rusiye prezidenti Vladimir Putinge video muracaatını yazıp, çöplükni saylav ayırğan stantsiyanı qapatmağa rica etti.
