Aqmescitniñ Rusiye akimiyeti Qırımtatar Milliy Meclisiniñ devletleştirilgen binasını muzıka mektebine bermek qararına kelgen. Bunı şeer memuriyetine atfı etip Rusiye haber vastaları bildire.
Mayısnıñ 24-nde Qırımnıñ Rusiye parlamentiniñ mebusları Ukrayina prezidentiniñ ömür arqadaşı Olena Zelenskanıñ Yaltadaki dairesiniñ ve Milliy Meclisniñ binasınıñ devletleştirilmesine qoltuttılar.
Vladimir Konstantinovnıñ sözlerine köreye, Rusiye Federatsiyasına qarşı ğayrı dost areketler yapqan çetel vadandaşlarnıñ ve devletlerniñ devletleştirilmek kerek olğan mal-mülkü cedveline 57 madde qoşulğan.
Evel Qırımnıñ işğal yolbaşçısı Sergey Aksönov, Qırımda "ukrayinalı iş adamlarınıñ mülküniñ" satıluvından elde etilgen paranıñ Rusiyeniñ Ukrayinağa qarşı cenkini temin etmek içün qullanılacağını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
