İşğal etilgen Aqmescitniñ ealisi arasında Rusiye akimiyetine qarşı narazılıq arta, dep bildire "Sarı şerit" ukrayin areketi.
"İnsanlar evel bunı aytmaqtan qorqqan edi, şimdi ise et avuşuvları, uçuşlarnı gizlev, qabarcılıq aqqında aytalar. Çünki işğalci akimiyet zayıflağanını duya", — dep bildire areket.
Bundan da ğayrı, "Sarı şerit" bildirgeni kibi, Aqmescitte kelgen ruslar çoq, çünki Rusiye "yerli ealiniñ oña kerçekten de qoltutacağına inanmay".
Faaller Ukrayinağa qol tutqan aktsiyalarından birisiniñ fotoresimini derc etti.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
