Aqmescitte "Gorod" kommunal müessisesiniñ işçileri Ekinci Cian cenkinde ğalebeniñ 75-inci yıldönümi munasebeti ile "soqaqlarnıñ, meydanlarnıñ güzelleştirmesi ve bayram bezetmesi" işlerini devam ete. Bunı Qırım.Aqiqat mühbiri haber ete.
Hususan, Pobedı, Kirova caddelerinde, Karla Marksa ve başqa soqaqlarında trolleybus ve fenir direklerinde bayraqlarnı asıp qoyalar.
Yol hızmetçileri yollardaki teşiklerni qapata, Yekaterina parkında tamir işlerini yapa.
Daa evel şeer içinde şimdi Qırımda yaşağan Ekinci Cian cenki veteranlarınıñ suretleri ile bilbordlar qoyuldı.
Daa evel bildirile edi ki, Aqmescitniñ rusiyeli akimiyeti mayıs 9-ına azırlanğan "bayram inşaatları"na 8,3 million ruble masraf etti. Şeer memuriyetiniñ başınıñ müavini Vladimir Osipenkonıñ aytqanına köre, mayıs 1 ve 9-ında şeerde "büyük kütleviy merasimler" olmaycaq, amma Aqmescitni bayram sıfatına ketirirler.
Rusiye işğal etken Qırımda 2014 senesinden berli sovetlerniñ ve Rusiyeniñ «Ğalebe künü» Qızıl ordu ve sovet halqınıñ natsist Almaniyası üzerindeki ğalebe künü olaraq qayd etile. Ukrainada mayısnıñ 8-nde Hatıra ve barışuv künü qayd etile, mayısnıñ 9-ı ise – Ekinci cian cenkinde natsizmni yeñüv künü olaraq.
