Aqmescitniñ merkezinde Rusiyeniñ Qırım ilhaqınıñ beşinci yılına bağışlanğan kontsertten soñ Aqmescitniñ kommunal hızmetleri şeerniñ merkeziy soqaqlarından tahminen 20 kubometr çöplükni çıqardı.
Bu aqta Aqmescitniñ Rusiye memuriyetiniñ matbuat hızmeti şeer hocalığı departamentiniñ yolbaşçısı Elvira Yevtuhovanıñ malümatına esaslanıp bildire.
«Aqmescit merkeziniñ temizlevi saat 00:00-da bitti, işke üç tehnika, «Gorod» belediye bücet müessisesiniñ 10 hadimi celp etildi. Gece Lenin meydanı, Karl Marks ve Sevastopolskaya soqaqları, Kirov caddesi ve diger yaqın soqaqlarda tahminen 20 kubometr çöplük toplandı», – dep qayd etti Yevtuhova.
Onıñ aytqanına köre, çöplük toplanğan soñ «Gorod» müessisesiniñ eki tozütarı merkeziy şeer keçişlerini temizledi, mahsus tehnika keçiş qısımnı yuvdı.
«Müessiseniñ bütün maşinaları marşrutlarına köre işke çıqtı, faqat kütleviy tedbirler keçirilgeninden sebep konteynerler gece 2-3 kere temizlendi. Lenin meydanında bayram vaqtında qoşma qutular qoyulğan edi, olarnı «Ekograd» hadimleri bugün saba erte alıp ketti», – dep qoştı şeer hocalığı departamentiniñ yolbaşçısı.
Martnıñ 18-nde aqşam Aqmescitteki Lenin meydanında Rusiyeniñ Qırım işğaliniñ beşinci yılı munasebetinen kontsert keçirildi. Qırım kütleviy haber vastalarınıñ bildirgenine köre, tedbirge 30 biñden çoq insan keldi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
