Aqmescitte «Kamenka» meskün massivi cumaaqşamı künü, yanvarniñ 31-nde, tamir işleri sebebinden elektriksiz qalacaq. Bu aqta «Krımenergo» saytında haber etilmekte.
«Avtobusnik», «Energiya», «Urojay», «Şinnik», «Prival», «Yagodka», «Domostroitel» bağça ortaqlıqları, Gaven (№ 21-25), Sokolinaya (№ 2), Topolevaya (№ 20-56 ve 21-53) soqaqlarında ışıq olmaycaq», – dep aytıla haberde.
Müessiseniñ malümatına köre, elektrikler saat 8:00-dan 17:00-ğa qadar olmaycaq.
Daa evel haber etilgeni kibi, ğarbiy Qırımnıñ meskün yerleri ast stantsiyalar ve elektrik ağlarındaki qazadan sebep elektriksiz qaldı.
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik Qırım öz generatorları, Rusiye generatorları ve Kuban energoköprüniñ elektrik ağını qullana.
