Aqmescitte martnıñ 11-nde küçlü yel sebebinden qaza neticesinde elektrikler kesildi, dep bildire «Krımenergo» müessisesi.
Bu malümatqa köre, şeerniñ bir qısmı saat 15:32-den 17:33-ke qadar elektriksiz qaldı.
Yel sebebinden Qurman rayonınıñ meskün yerleri de elektrikten kesilgen edi: Neygofnungstal (Vladimirovo), Çalbaş (Dohodnoye), Fraydorf (Novoseltsı), Buzavçı (Novopokrovka) (qısmen).
Martnıñ 11-nde aqşam üstü Alupka ve Bağçasarayda elektrikler kesilgen edi.
Sinoptikler martnıñ 11-nde olacaq küçlü furtuna yeli aqqında tenbilegen edi.
2016 senesi baarde rus energoköprüniñ dördünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik Qırım öz generatorları, Rusiye generatorları ve Kuban energoköprüniñ elektrik ağını qullana.
