Rusiye kontrolindeki Aqmescitniñ Kiyev rayon mahkemesinde aprelniñ 4-nde «Veciye Kaşka davasınıñ» mahkeme tahqiqatı yekünlendi. Oturışuvda qabaatlanğan dört kişi – Bekir Degermenci, Asan Çapuh, Kazim Ametov ve Ruslan Trubaç – sorğuğa çekildi, olar qabaatlarını tanımadılar.
Bu aqta advokat İslâm Velilâyev Qırım.Aqiqat mühbirine tarif etti.
«Davanıñ mahkeme tahqiqatı yekünlendi. Mahkemelengen dört kişi sorğuğa çekildi. İç birisi özüni qabaatlı dep tanımadı. Er biri rahmetli Veciye Kaşkağa yardım etmek içün areket etkenini bildirdi. Olar özüne fayda ketirmege tüşünmegenlerini ayttılar. Ayrıca qayd etmek kerek ki, Asan Çapuh evinde tintüv vaqtında tapılğan silâ oña ait olmağanını ve gizliden qoyulğanını bildirdi», – dedi advokat.
Onıñ qayd etkenine köre, aprelniñ 10-na keçirilmesi planlaştırılğan kelecek mahkeme oturışuvında mahkeme taraflarnıñ munaqaşalarına keçecek.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Yanvarniñ 27-nde Kreml kontrolindeki Aqmescitniñ Kiyev rayon mahkemesi «Veciye Kaşka davasınıñ» mabüsleri Bekir Degermenci, Kazim Ametov ve Ruslan Trubaçnıñ sıñırlav tedbirini deñiştirip, olarnı ev apsine aldı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
