Qırımlı advokat Edem Semedlâyevni qarşılağanları içün yaqalanğan 11 qırımtatar faali Aqmescit ve Kezlevniñ Muvaqqat tutuv izolâtorlarında memuriy tevqiften soñ azat etildi, dep haber ettiler «Qırım birdemligi» cemaat birleşmesinde.
Dekabrniñ 5-nde aqşam noyabrniñ 23-nde yaqalanğan Alim Suleymanov, Kemal Abdurazakov, Alim Aliyev, Zekirya Demerci, Dlâver İbragimov, Settar Settarov, Reşat Paralamov, Murtaza Fahriyev ve Server Çolakçik azat etildi. Olarnıñ arasında «Qırım birdemligi»niñ eki jurnalisti – Alim Suleymanov ve Dlâver İbragimov ve «Qırım birdemligi»niñ koordinatorları Server Çolakçik bar. Episi Kezlevniñ Muvaqqat tutuv izolâtorında cezalarını çekti.
Bundan ğayrı Smail Abdurmanov ve Selim Teyfukov da azat etildiler. Olar Aqmescit Muvaqqat tutv izolâtornında cezalarını çektiler.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
