Aqmescit ve Keriçniñ bir qaç rayonı iyün 5-inde ağlardaki qaza sebebinden suvsız qaldı. Bunü "Voda Krıma" müessisesi bildire.
Böylece, Gresovskiy qasabası, Sovhoznoye köyü, "Energetik" ortaqlığı, Zelönaya soqağında saat 13:00-ğace suv sıñırlı olacaq. Saat 14:00-ğace Aqmescitniñ M.Jukova mikrorayonında, Yuqarı ve Aşağı platoda suv olmaycaq.
Keriçniñ Yedi Quyu rayonında saat 17:00-ğace suv olmaycaq.
"Proyekt" rusiye matbuatı iyün 3-ünde Qırımnıñ rusiyeli akimiyeti yarımadanıñ suv teminatı meselesini çezip olamay, dep haber etti.
Rusiyeli Qırım başı Sergey Aksönov, 2020 sene 150 yıl içinde eñ quru yıl oldı, dep ayta.
Soñki ayda Qırımnıñ suv anbarlarınıñ tolması 7,1 mln kubometr az oldı, dep qabul etti Suv hocalığı devlet komiteti.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Чернореченское водохранилище стремительно мелеет (фотогалерея)
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
