Soñki afta Aqmescit suv anbarlarınıñ yedekleri pek artmadı, dep bildire «Voda Krıma» müessisesiniñ reberi Vladimir Bajenov.
Bu aqta o, martnıñ 15-nde suv teminlevi operativ ştabınıñ toplaşuvında ayttı.
«Aqmescit suv anbarlarınıñ yedekleri, ne yazıq ki, Yaltadaki kibi pek tolmay. Ayan suv anbarınıñ vaziyetini biraz eyileştirdik. Bu bizim içün pek müim. Anda 1 mln 300 kub yedegimiz bar. Toqtamağan zararlar vaqtında şeerni suv anbarları sayesinde tutacaqmız. Quyular stabil oldı», – dedi Bajenov.
Keçken afta Bajenov, qaza olsa, Aqmescit ve Aqmescit rayonınıñ sakinlerine suv «toqtamayıp» berilecek, dep söz bergen edi.
Rusiye kontrolindeki Qırım mesken-kommunal hocalıq nazirligi martnıñ 5-nde yerli suv anbarlarınıñ tolmasına dair yañı malümatnı derc etti. Müessise malümatına köre, Aqmescit ve Zagorsk suv anbarları «ölü seviyede» qala. Balanov ve Taygan suv anbarları bu seviyege yaqın.
Suv qıtlığı sebebinden keçken seneden berli Aqmescitte ve diger regionlarda suv berüv cedvelleri kirsetildi. Bunıñnen beraber Aqmescitte suv teminlevi hatlarında qazalar ola, bu da suv kesilüviniñ sebebi ola.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
