Aqmescit supermarketlerinde tibbiy maskalar satılıp başlandı. Beş bir kerelik maskalarnıñ fiyatı 175 ruble oldı, dep bildire Qırım.Aqiqat mühbiri.
Kassa yanındaki ilânda aytılğanına köre, maskalarnıñ sayısı sıñırlandı ve memuriyet olarnıñ satışını sıñırladı – bir insanğa eñ çoq bir taqım berilecek.
İçtimaiy ağlarda elnen tikilgen çoq kerelik maskalar ilânı peyda oldı, olarnıñ fiyatı 40-tan 500 rublege qadar deñişe.
Keçken afta Qırımnıñ Rusiye ükümeti yolbaşçısı Yuriy Gotsanükniñ aytqanına köre, Qırımğa 5 mln tibbiy maska kerek. Qırımnıñ Roszdravnadzor yolbaşçısı Vasiliy Klimovnıñ bildirgenine köre, Qırım aphanelerine martnıñ 21-nde tibbiy maskalar ketirilmedi. Müessise, qırımlılarğa maska tikmege teklif etti.
Daa evel berilgen malümatqa köre, martnıñ 30-na qadar Qırımda 2801 insan tibbiy közetüv altında, 62 insan hastahanede, 10 kişi observatorlarda buluna.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
