Aqmescitteki №1 SİZOda bir qaç mabüs qızamıq çıqardı. Bu aqta Rusiye devlet kütleviy haber vastaları Qırım ve Aqyardaki Rusiyeniñ Cezalarnı yerine ketirüv federal hızmeti idaresiniñ matbuat hızmetine esaslanıp bildire.
«Aqmescit şeeriniñ №1 SİZOsında qızamıq çıqqanı içün bir sıra kamerada karantin ilân etildi. Rusiyeniñ sanitar qanunlarına köre tahqiqat izolâtorında qırğınlıqqa qarşı tedbirler keçirile. Bağda olğanlarğa qızamıq aşısı yapıldı», – dep bildire müessise haberini «RİA Novosti Krım».
Müessiseniñ qayd etkenine köre, sanitar-qırğınlıq talaplarına riayet etüv ve qırğınlıqqa qarşı tedbirlerniñ keçirilüvi Rusiyeniñ Cezalarnı yerine ketirüv federal hızmetiniñ devlet sanitar-qırğınlıq nezareti baş merkezi tarafından kontrol etile.
Daa evel haber etilgeni kibi, Qırımda «para talap etüv davası» boyunca mahküm etilgen Aluşta Rusiye şeer şurasınıñ sabıq deputatı Pavel Stepançenko Aqmescit SİZOsında qızamıq çıqardı.
Bundan evel Ukraina ombudsmeni Lüdmila Denisova Aqmescit SİZOsında qızamıq qırğınlığı başlandı, dep haber etti.
Daa soñra «Qırım birdemligi» cemaat birleşmesiniñ koordinatorlarından biri Server Mustafayevniñ advokatı Lilâ Gemeci Aqmescit SİZOsınıñ memuriyetine qarşı «müvekkilini qızamıqqa oğartmağa tırışqanı içün» dava açtırdı.
Rusiye Cezalarnı yerine ketirüv federal hızmeti Aqmescit SİZOsında qızamıq qırğınlığı aqqında resmiy şekilde bildirmey. Qırım.Aqiqat bu malümatnı tasdıqlamağa tırışa.
Qırımda yılnıñ başından qızamıq çıqarğan 150 insan qayd etildi, dep haber ete Rospotrebnadzornıñ Qırım idaresi.
Qızamıq bir insandan başqasına öksürik, sıqı şahsiy bağlarda keçe. Virus bir yerde eki saat devamında faal qala ve avada saqlana. Başta hastanıñ suvuqlanuv alâmetleri ola: tımav, sıcaq, öksürik, tahminen bir aftandan tökme çıqa (başta, soñra ise – vucutnıñ ust ve alt qısımlarında). Qızamıq ağırlaşuvları arasında – siñir sistemasına zarar ketirüv, pnevmoniya, otit, közlerniñ zayıflaması.
