Cezalarnı yerine ketirüv federal hızmetiniñ hadimleri Aqmescit SİZOsında «terror» maddelerine istinaden qabaatlanğan «Qırım birdemliginiñ» koordinatorı Server Mustafayev ve vatandaş jurnalisti Nariman Memedeminovnıñ kameralarını tintti. Tintüvler vaqtında cinaiy davalarınen bağlı yazıları olğan defterleri alındı. Bu aqta advokatlar Lilâ Gemeci ve Emil Kurbedinov Qırım.Aqiqat mühbirine bildirdiler.
İmayecilerniñ qayd etkenine köre, «qabaatlanğanlarnıñ imaye aqqı qaba bir şekilde bozuldı».
«Narimannıñ bildirgenine köre, bir afta evelsi kamerada keçirilgen tintüv vaqtında bütün defterleri ve cinaiy dava ve SİZOda tutuluv ile bağlı bütün yazıları musadere etildi. Bir qaç şikâyetten soñ bugün saba dava malümatınen tanışuv ile bağlı bir qısmı oña qaytarıldı. Onıñ faal olaraq taqip etilüvi ve qırımtatarlarnıñ taqip etilüvi aqqında yazı ve arizalar tutıp alındı ve qaytarılmadı», – dep tarif etti Kurbedinov.
Mustafayevniñ evi eki kere tintildi – mayısnıñ 26-nda ve 28-nde.
«SİZO hadimleri bu tintüv planlaştırılğan edi, dep ayttı. Serverniñ dava malümatlarınen tanış olğanda yapqan qaydları, şikâyet berüv yazıları, olacaq mahkemede imayenen bağlı izaatları tutıp alındı. Musadere aktı tizilmedi», – dep tarif etti advokat Lilâ Gemeci.
Gemeciniñ aytqanına köre, bugün saba onıñ müvekkili SİZO hadimleriniñ areketlerini şikâyet etti.
«Bunı imaye aqqınıñ bozuluvı dep sayamız. Üç qurulışqa şikâyet arizaları berildi: SİZO yolbaşçısı, CYKFH üzerinde nezaret prokuraturası ve Qırımdaki insan aqları vekâletlisine», – dep qoştı advokat.
Qırımdaki Cezalarnı yerine ketirüv federal hızmetiniñ saytında Mustafayev ve Memedeminovnıñ kameralarında keçirilgen tintüvler aqqında malümat yoq.
«Qırım birdemliginiñ» koordinatorı Server Mustafayev 2018 senesi mayısnıñ 21-nde tutulğan edi. Onıñ davası Bağçasaraydaki «Hizb ut-Tahrir davasına» ilâve etildi.
Vatandaş jurnalisti Nariman Memedeminov Rusiye quvetçileri tarafından 2018 senesi martnıñ 23-nde tutulğan edi. Onı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
