Aqmescit SİZOsında qırımtatar faali Edem Bekirov ve aynı kamerada bulunğan Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ allergiyası başladı.
Bu aqta Ukraina Yuqarı Radasınıñ insan aqları vekâletlisi Lüdmila Denisova Facebook saifesinde yazdı.
Onıñ aytqanına köre, fevralniñ 6-nda Bekirovnıñ kamerasına advokatı (adı aydınlatılmay – QA) kirsetildi. Körüşüvde Qırımdaki Rusiye ombudsmeni Lüdmila Lubina, Aqmescit SİZOsınıñ yolbaşçısı Sergey Berejnoy ve Aqmescit SİZOsınıñ tibbiy bölük yolbaşçısı vazifelerini eda etken Aleksey İşçenko bar edi.
«Subet vaqtında belli olğanına köre, Edem Bekirov ve aynı kamerada tutulğan Server Mustafayevniñ allergiyası başladı, kamerada mantar bardır. Eki siyasiy mabüsniñ tutuluv şaraitleri belgilengen normalarğa uymay, dep netice çıqarmaq mümkün. Olğan hastalıqlarğa baqılsa, Bekirov hastahanege alıp ketirilmek kerek edi. Adamnıñ alı fenalaşa, şimdi ise allergiya da başladı», – dep qayd etti Denisova.
Onıñ qayd etkenine köre, bunı körgen Aleksey İşçenko Edem Bekirov hastahanege alıp ketirilecek, dep vade etti, Sergey Berejnoy ise eki erkekniñ tutuluv şaraitleri eñ yaqın vaqıtta eyiliştirilecek, dep işandırdı.
«Rusiye insan aqları vekâletlisi Tatyana Moskalkovağa muracaat yolladım. Apiste tutulğan Ukraina vatandaşlarınıñ allergiya sebeplerini ögrenmege, tibbiy yardım kösterilmesine ve uyğun şaraitlerniñ temin etilmesine yardım etmesini istedim», – dep bildirdi Denisova.
Fevralniñ 6-nda Kyivdeki matbuat konferentsiyasında Edem Bekirovnıñ qızı Eleonora babasınıñ hastalıqları ölümine sebep ola, dep qorqqanını aydınlattı. Onıñ aytqanına köre, Aqmescit SİZOsında Bekirovğa kerekli tibbiy yardım kösterilmey.
Daa evel Ukraina Yuqarı Radasınıñ insan aqları vekâletlisi Lüdmila Denisova Qırımda apiske alınğan qırımtatar faali Edem Bekirovnıñ sağlıq vaziyeti kritik, dep bildirgen edi.
Daa evel Bekirov ilk tahqiqat çerçivesinde belgilengen psihologik-psihiatrik ekspertizadan keçti, dep haber etilgen edi.
Qırımda tevqif etilgen qırımtatar faali Edem Bekirov «Qırım birdemligi» areketiniñ koordinatorlarından biri Server Mustafayev ile SİZOda aynı kamerada qala.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Ukraina Tış işler nazirligi mahkemeniñ qararına qarşı «sert narazılıq» bildirdi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Yanvarniñ 15-nde Bekirov Aqmescit SİZOsından Semaşko Cumhuriyet hastahanesiniñ endokrinologiya bölügine tibbiy teşkerüvge avuştırılğan edi. Yanvarniñ 18-nde Ukraina Yuqarı Radasınıñ insan aqları vekâletlisi Lüdmila Denisova Bekirov hastahaneden çıqarılıp, Aqmescit SİZOsınıñ mahsus blokuna yollanıldı, dep bildirdi.
