Aqmescitniñ №1 Tahqiqat izolâtorında 10 kamera anda apiste yatqanlar arasında COVID-19 hastaları qayd etilgeni içün karantinde buluna. Bu aqta advokat Ayder Azamatov Aqmescit SİZOsında tutulğan müvekkili İsmet İbragimovnen subetleşken soñ Qırım.Aqiqat mühbirine bildirdi.
«Tünevin Qırım FSBsinde müvekkilim İsmet İbragimovnen tahqiqat tedbirleri keçirildi. Onıñ alını, SİZOda COVID-19 hastaları barmı dep soradım, ve o, onıñ malümatına köre, 10 kamera karantin rejiminde buluna, dep bildirdi. SİZOdan çıqarılğanda başqa mabüslernen laf etkende haber aldı. Olarnıñ aytqanına köre, apiste yatqanlar kameralarından çıqmay, kezmey, yuvunmay, tahqiqat tedbirlerine ve mahkemelerge olarnı ketirmeyler», – dedi Ayder Azamatov.
Advokatnıñ aytqanına köre, müvekkili tahqiqat tedbirleri vaqtında şahsiy qoruv aletlerinen temin etilmedi.
«FSB hadimleri ve tahqiqatçılar maska ve respirator taqa, amma müvekkilerimizniñ ne maskası, ne qolçağı, ne de başqa bir qoruv vastası bar», – dep qoştı Azamatov.
Qırım.Aqiqat Qırım ve Aqyardaki Rusiyeniñ Cezalarnı yerine ketirüv federal hızmetine muracaat etip, SİZO vaziyetini izaatlamağa rica etti.
Daa evel Qırımdaki Rusiyeniñ Cezalarnı yerine ketirüv federal hızmeti bildirgenine köre, №1 koloniyasında «mabüsler arasında hastalıq tarqalmasın dep» karantin ilân etildi.
İyünniñ 15-nde belli olğanına köre, Qurmandaki «Hizb ut-Tahrir davasınıñ» mabüsleri Eskender Abdulganiyev ve Arsen Abhairov tutulğan Rostov-na-Donu SİZOsı koronavirus sebebinden bir ayğa karantinge qapatıldı.
Ukraina Yuqarı Radasınıñ İnsan aqları vekâletlisi Lüdmila Denisova Rostov SİZOsında qayd etilgen koronavirus hastalığı sebebinden qasevetlengenini bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
