İşğal etilgen Qırımda yekâne olğan Aqmescitniñ №1 Tahqiqat izolâtorı rıqma-rıq tolu. Bu aqta Rusiye baş prokurorı Yuriy Çaykanıñ Federatsiya Şurasına er yıl bergen maruzasında aytıla.
«Er yedinci tahqiqat izolâtorı (211-den 29-ı) tolu olıp çalışmağa devam ete edi. Bu problem Qırım ve Tataristan cumhuriyetleri, Krasnodar ve Stavropol ülkeleri, Voronej, Moskva ve Rostov vilâyetleri, Moskvada bar», – dep aytıla TASS Rusiye haber agentligi aydınlatqan maruzada.
Qırım.Aqiqat Qırımnıñ Rusiye ombudsmeni Lüdmila Lubinanıñ Aqmescit SİZOsındaki vaziyetnen bağlı izaatlarını almağa tırışa.
2019 senesi yanvarniñ 1-nde Rusiye ve işğali altındaki Qırımnıñ tahqiqat izolâtorlarında 99.4 biñ insan tutulğan edi, dep haber etile.
Qırım ilhaqından soñ Rusiye akimiyeti apiske alınğan ve mahküm etilgen insanlarnı işğal etilgen Qırımdan qomşu Rusiyeniñ apis müessiselerine alıp kete.
Qırımda Aqmescitteki №1 Tahqiqat izolâtorı, Keriçteki №1 yaşav koloniyası ve №2 tüzetüv koloniyası, Aqmescitteki №1 tüzetüv koloniyası çalışa.
Aq qorçalayıcılarnıñ qayd etkenine köre, cenk vaqtında vatandaş ealisiniñ qorçalavına dair IV Jeneva şartnamesiniñ 49-ıncı maddesi işğal altındaki topraqlarnıñ sakinlerini işğalci memleketke alıp ketmege yasaq ete.
