Rusiyeniñ Aqmescit şeerindeki 1-nci tahqiqat tevqifhanesinde siyasiy motivli davalar ile Rusiye quvetçileri tarafından tutulğan qırımtatarlar dinlerine köre zulumğa oğratıla. Bunı "QırımSOS" uquq qoruyıcı teşkilâtınıñ reberi Oleksiy Tılnenko QIRIM News agentligine intervyü berir eken bildirdi.
"Misal olaraq, hususan qırımtatarlarğa kelgende – olarnı başqa bir din olğanı içün olarğa tazyıq köstergen musulman olmağanlarnen pek sıq yerleştireler...Bundan ğayrı, azmı çoqmı diniy işançlarına sadıq qalğan qırımtatarlar, ne qadar qaba olsa da, sıq-sıq bezdireler. Çünki, diniy işançlarından sebep olarğa berilgen aşlarnı aşap olamaylar", - dedi o.
"QırımSOS"nıñ malümatına köre, Qırımda eñ az 150 siyasiy motivli taqip qubanı apis yerlerinde tutula.
Ukrayina Ombudsmanı Dmıtro Lubinetsniñ soñki malümatına köre, Rusiyede qanunsız sürette 180 qırımlı siyasiy mabüsni tutula, olardan 116 qırımtatardır.
Bu seneniñ fevral ayında Rusiye apsinde eki qırımlı siyasiy mabüs öldi – Konstantin Şiring ve Cemil Gafarov.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
